Минея, 23 Ноября,
Глас 1
Песнь 1
Ирмос Песнь побе́дную пои́м вси Бо́гу,/ сотво́ршему ди́вная чудеса́ мы́шцею высо́кою/ и спа́сшему Изра́иля, я́ко просла́вися.
Припев Пресвята́я Богоро́дице, спаси́ на́с.
Стеце́мся днесь, Богоро́дицу почита́юще пе́сньми,/ и торжеству́им духо́вный пра́здник:/ в храм бо Бо́гу дар прино́сится.
Припев Пресвята́я Богоро́дице, спаси́ на́с.
Пе́сньми да воспои́м Богоро́дицы сла́вное предше́ствие:/ к хра́му бо днесь, я́ко храм Бо́жий,/ прино́сится проро́чески дар многоце́нный.
Припев Пресвята́я Богоро́дице, спаси́ на́с.
А́нна непоро́чная ра́довашеся,/ я́ко дар многоце́нен Бо́гу принося́щи в храм ма́терски,/ Иоаки́м же с не́ю торжеству́ет све́тло.
Припев Пресвята́я Богоро́дице, спаси́ на́с.
Дави́д, пра́отец Твой, воспе́ Тя дре́вле, Де́во Богоневе́сто,/ Дщерь глаго́ля Тя Царя́ Христа́,/ Его́же и, роди́вши, ма́терски Младе́нца дои́ла еси́.
Сла́ва Отцу́ и Сы́ну и Свято́му Ду́ху.
_Троичен Пло́тию триле́тствующи, Богоро́дица Го́споду прино́сится;/ Заха́рия же Сию́, свяще́нник Бо́жий, прие́м,/ ра́дуяся, в храм возложи́.
И ны́не и при́сно и во ве́ки веко́в. Ами́нь.
_Богородичен Де́вы, ликовству́йте,/ свещено́сицы, начни́те днесь,/ и ма́тери, воспо́йте Цари́це Ма́тери,/ приходя́щей в храм Царя́ Христа́.
Песнь 3
Ирмос Да утверди́тся се́рдце мое́ в во́ли Твое́й, Христе́ Бо́же,/ И́же над вода́ми Не́бо утвержде́й второ́е/ и основа́вый на вода́х зе́млю, Всеси́льне.
Припев Пресвята́я Богоро́дице, спаси́ на́с.
Торжеству́им, празднолю́бцы, и сра́дуемся ду́хом/ во святе́м пра́зднице, учрежда́ющеся днесь, Дще́ре Царе́вы/ и Ма́тере Бо́га на́шего.
Припев Пресвята́я Богоро́дице, спаси́ на́с.
Иоаки́ме, ра́дуйся днесь,/ и весели́ся, А́нно, ду́хом,/ рожде́нную из вас Го́споду приводя́ще триле́тствующу,/ я́ко Ю́ницу Чи́сту Всенепоро́чную.
Припев Пресвята́я Богоро́дице, спаси́ на́с.
Бо́жие селе́ние во храм святы́й приво́дится, Богоро́дица Мариа́м,/ пло́тию триле́тствующая,/ и Той свещесве́тят де́вы, предтеку́ще.
Припев Пресвята́я Богоро́дице, спаси́ на́с.
Бо́жия А́гница небла́зненная и голуби́ца нескве́рная,/ Боговмести́мая ски́ния, сла́вы освяще́ние,/ в ски́нии святе́й обита́ти избра́.
Припев Пресвята́я Богоро́дице, спаси́ на́с.
Триле́тствующая те́лом и многоле́тствующая ду́хом,/ ши́ршая Небе́с и Го́рних сил превы́шшая,/ да восхва́лится пе́сньми Богоневе́стная.
Припев Пресвята́я Богоро́дице, спаси́ на́с.
Богоро́дицы пра́зднующе в невходи́мых предше́ствие,/ свещеиму́ще у́мно с весе́лием,/ днесь и мы с де́вами к хра́му прибли́жимся.
Припев Пресвята́я Богоро́дице, спаси́ на́с.
Свяще́нницы Бо́жии,/ облецы́теся в пра́вду благода́тию и сря́щите све́тло,/ вхо́ды подаю́ще Дще́ри Царя́ и Бо́га во свята́я.
Сла́ва Отцу́ и Сы́ну и Свято́му Ду́ху.
_Троичен Свет Оте́ц, Свет Сын Его́, Свет Дух Уте́шительный:/ я́ко от Со́лнца бо Еди́наго Тро́ицы, сия́юще,/ Боже́ственно озаря́ет и соблюда́ет ду́ши на́ша.
И ны́не и при́сно и во ве́ки веко́в. Ами́нь.
_Богородичен Тя проро́цы пропове́даша киво́т, Чи́стая, святы́ни,/ кади́льницу злату́ю, и све́щник, и трапе́зу,/ и мы, я́ко Боговмести́мую ски́нию, воспева́ем Тя.
Седален, глас 4
Непоро́чная А́гница и нескве́рный черто́г,/ в дом Бо́жий Богоро́дица Мариа́м с весе́лием вво́дится пресла́вно,/ Ю́же А́нгели Бо́жии дорино́сят ве́рно,/ и вси ве́рнии блажа́т при́сно/ и благода́рственно пою́т Ей непреста́нно ве́лиим гла́сом:/ на́ша сла́ва и спасе́ние Ты еси́, Всенепоро́чная.
Песнь 4
Ирмос Ду́хом прови́дя, проро́че Авваку́ме, Словесе́ воплоще́ние,/ пропове́дал еси́, вопия́:/ внегда́ прибли́житися ле́том, позна́ешися,/ внегда́ приити́ вре́мени, пока́жешися./ Сла́ва си́ле Твое́й, Го́споди.
Припев Пресвята́я Богоро́дице, спаси́ на́с.
Проро́че Иса́ие, прорцы́ нам,/ Де́ва кто есть, иму́щая во чре́ве?/ Я́же из Иу́дина ко́рене прозя́бши/ и ро́ждшися из Дави́да царя́,/ се́мене свята́го плод благосла́вный.
Припев Пресвята́я Богоро́дице, спаси́ на́с.
Начина́йте, де́вы, и воспо́йте пе́сни,/ рука́ми держа́ще свещи́, Чи́стыя Богоро́дицы предше́ствие хва́ляще,/ ны́не гряду́щия во храм Бо́жий, ку́пно с на́ми пра́зднующе.
Припев Пресвята́я Богоро́дице, спаси́ на́с.
Иоаки́ме и А́нно, весели́теся ны́не,/ во храм приводя́ще Госпо́день Чи́стую Бо́га Ма́терь Христа́ Всецаря́ бу́дущую,/ от вас же ро́ждшуюся, я́ко триле́тствующую Ю́ницу.
Припев Пресвята́я Богоро́дице, спаси́ на́с.
Свята́я святы́х су́щи, Чи́стая,/ во храм святы́й возлюби́ла еси́ всели́тися/ и, со А́нгелы, Де́во, бесе́дующи, пребыва́еши,/ пресла́вне с Небе́с хлеб прие́млющи, Пита́тельнице Жи́зни.
Припев Пресвята́я Богоро́дице, спаси́ на́с.
Ро́ждше па́че наде́жди Пречи́стую Де́ву,/ благочести́во обеща́хуся Бо́гу принести́/ и исполня́ют, даю́ще я́ко же́ртву, рожде́нную от них,/ Иоа́ким днесь и А́нна, в дом Бо́жий.
Припев Пресвята́я Богоро́дице, спаси́ на́с.
Прозябе́ жезл иногда́ Ааро́нов,/ прообразу́ющий, Чи́стая, Боже́ственное Рождество́,/ я́ко безсе́менно зачне́ши, и нетле́нна пребу́деши,/ и по рождестве́ де́вствующи яви́шися,/ Младе́нца пита́ющи – всех Бо́га.
Припев Пресвята́я Богоро́дице, спаси́ на́с.
Де́вы – Де́ву, и ма́тери – Ма́терь/ благоче́стно стецы́теся почти́ти с на́ми ро́ждшуюся/ я́ко непоро́чную же́ртву и рожде́нную Бо́гу плодоноси́мую,/ вси у́бо све́тло пра́зднуем.
Сла́ва Отцу́ и Сы́ну и Свято́му Ду́ху.
_Троичен Тро́ицу Ли́цы, Еди́ницу о́бразом,/ благоче́стно сла́вим Бо́га И́стинна,/ Его́же пою́т А́нгельская и Арха́нгельская чинонача́лия я́ко тва́ри Влады́ку,/ и челове́цы ве́рно, покланя́ющеся при́сно.
И ны́не и при́сно и во ве́ки веко́в. Ами́нь.
_Богородичен Моли́ непреста́нно, Пресвята́я Чи́стая,/ Его́же пло́тию родила́ еси́, Сы́на Твоего́ и Бо́га,/ от многообра́зных се́тей диа́волих и от вся́ких искуше́ний находя́щих вся изба́вити рабы́ Твоя.
Песнь 5
Ирмос Све́тлый нам возсия́й Свет Присносу́щный,/ у́тренюющим о судьба́х за́поведей Твои́х,/ Влады́ко Человеколю́бче, Христе́ Бо́же наш.
Припев Пресвята́я Богоро́дице, спаси́ на́с.
Да светлоно́сим, правосла́внии вси, стека́ющеся и сла́вяще Богома́терь,/ я́ко Го́споду днесь приво́дится/ я́ко же́ртва благоприя́тна.
Припев Пресвята́я Богоро́дице, спаси́ на́с.
Да веселя́тся пра́отцы днесь, Влады́чице,/ и да ра́дуется ро́ждшая Тя со отце́м Твои́м,/ я́ко плод их Го́споду прино́сится.
Припев Пресвята́я Богоро́дице, спаси́ на́с.
Многоимени́тую и сла́внейшую Непоро́чную Ю́ницу,/ я́ко пло́тию ро́ждшую Боже́ственнаго Тельца́,/ вси воспои́м, ве́рно пра́зднующе.
Припев Пресвята́я Богоро́дице, спаси́ на́с.
Уневе́щения напису́ются Боже́ственная зна́мения/ па́че ума́ рождества́ Твоего́, Чи́стая Де́во,/ днесь Ду́хом Святы́м в дому́ Бо́жии.
Припев Пресвята́я Богоро́дице, спаси́ на́с.
Да отве́рзутся преддве́рия сла́вы Бо́га на́шего/ и да прие́млют Неискусобра́чную Бо́жию Ма́терь,/ я́коже триле́тствующую Нескве́рную Ю́ницу.
Припев Пресвята́я Богоро́дице, спаси́ на́с.
Многочестну́ю и присе́нную го́ру воспои́м –/ Присноде́ву, Бо́жию Ма́терь бы́вшу:/ Та бо облиста́ свет в конце́х.
Сла́ва Отцу́ и Сы́ну и Свято́му Ду́ху.
_Троичен Пренача́льное и Присносу́щное Еди́но Божество́ славосло́вяще, поклони́мся,/ Тре́ми Ли́цы естество́м неразде́льное/ и сла́вою равноче́стное.
И ны́не и при́сно и во ве́ки веко́в. Ами́нь.
_Богородичен Приста́нище благоути́шное и необори́мую сте́ну стяжа́хом,/ моли́тву Твою́ во обстоя́ниих, Богороди́тельнице,/ всегда́ избавля́еми бед и скорбе́й.
Песнь 6
Ирмос Проро́ка Ио́ну подража́я, вопию́:/ живо́т мой, Бла́же, свободи́ из тли/ и спаси́ мя, Спа́се ми́ра, зову́ща: сла́ва Тебе́.
Припев Пресвята́я Богоро́дице, спаси́ на́с.
Пра́зднуим, ве́рнии, пра́здник духо́вный Ма́тере Бо́жия,/ воспева́юще благоче́стно:/ есть бо святе́йша Небе́сных умо́в.
Припев Пресвята́я Богоро́дице, спаси́ на́с.
Пе́сньми духо́вными восхва́лим, ве́рнии, Ма́терь Све́та,/ я́ко днесь нам яви́ся,/ предходя́щи в храм Бо́жий.
Припев Пресвята́я Богоро́дице, спаси́ на́с.
Нескве́рная А́гница и Чи́стая Голуби́ца/ приведе́ся обита́ти в дом Бо́жий,/ я́ко Непоро́чная, пронарече́нная бы́ти Ма́ти Бо́жия.
Припев Пресвята́я Богоро́дице, спаси́ на́с.
В храм зако́нный вхо́ды соверша́ет храм Бо́жий, Небе́сная ски́ния,/ из Не́йже нам, су́щим во тьме, Свет возсия́.
Припев Пресвята́я Богоро́дице, спаси́ на́с.
Младе́нствующи пло́тию и соверше́на душе́ю,/ Святы́й Киво́т в дом Бо́жий вхо́дит/ воспита́тися Боже́ственною благода́тию.
Припев Пресвята́я Богоро́дице, спаси́ на́с.
От вся́ких искуше́ний и бед душе́вных свободи́ ны,/ притека́ющия к Тебе́, Всепе́тая,/ Твои́ми мольба́ми, Ма́ти Христа́ Бо́га.
Сла́ва Отцу́ и Сы́ну и Свято́му Ду́ху.
_Троичен Оте́ц, и Сын, и Дух пра́вый,/ Триипоста́сная Еди́нице и Нераздели́мая Тро́ице,/ поми́луй покланя́ющияся Боже́ственней Держа́ве Твое́й.
И ны́не и при́сно и во ве́ки веко́в. Ами́нь.
_Богородичен Во чре́ве Твое́м вмеще́н Невмести́мый все́ми, Богома́ти, быв,/ из Тебе́ произы́де, Пречи́стая,/ сугу́б естество́м Бог и Челове́к.
Кондак, глас 4
Пречи́стый храм Спа́сов,/ многоце́нный черто́г и Де́ва,/ свяще́нное сокро́вище сла́вы Бо́жия,/ днесь вво́дится в дом Госпо́день, благода́ть совводя́щи,/ я́же в Ду́се Боже́ственном,/ Ю́же воспева́ют А́нгели Бо́жии:/ Сия́ есть селе́ние Небе́сное.
Икос
Неизрече́нных Бо́жиих и Боже́ственных та́ин/ зря в Де́ве благода́ть явля́емую и исполня́емую я́вственно,/ ра́дуюся и о́браз разуме́ти недоуме́юся, стра́нный и неизрече́нный:/ ка́ко избра́нная, Чи́стая, Еди́на яви́ся па́че всея́ тва́ри ви́димыя и разумева́емыя?/ Те́мже восхвали́ти хотя́ Сию́, ужаса́юся зело́ умо́м же и сло́вом,/ оба́че дерза́я, пропове́даю и велича́ю:/ Сия́ есть селе́ние Небе́сное.
Песнь 7
Ирмос Пещь, Спа́се, ороша́шеся,/ о́троцы же, лику́юще, поя́ху:/ отце́в Бо́же, благослове́н еси́.
Припев Пресвята́я Богоро́дице, спаси́ на́с.
Ликовству́им, празднолю́бцы, днесь,/ воспои́м Чи́стую Влады́чицу,/ Иоаки́ма и А́нну досто́йно чту́ще.
Припев Пресвята́я Богоро́дице, спаси́ на́с.
Проро́чествуй, Дави́де, глаго́ля Ду́хом:/ приведу́тся де́вы вслед Тебе́,/ приведу́тся Тебе́ во храм Цари́це Ма́тери.
Припев Пресвята́я Богоро́дице, спаси́ на́с.
Ра́довахуся А́нгелов чи́ни,/ веселя́хуся пра́ведных ду́си,/ я́ко Бо́жия Ма́терь во свята́я приво́дится.
Припев Пресвята́я Богоро́дице, спаси́ на́с.
Прие́млющи пи́щу Небе́сную,/ преспева́ше му́дростию и благода́тию,/ бы́вши Ма́ти по пло́ти Христа́ Бо́га.
Припев Пресвята́я Богоро́дице, спаси́ на́с.
И те́лом и ду́хом ра́довашеся,/ пребыва́ющи Мари́я Непоро́чная во хра́ме Бо́жии,/ я́коже сосу́д свяще́ннейший.
Припев Пресвята́я Богоро́дице, спаси́ на́с.
Введо́ша Тя во вну́треннейшее хра́ма целому́дреннии роди́телие Твои́, Пречи́стая,/ воспита́тися стра́нно в жили́ще Христа́ Бо́га.
Сла́ва Отцу́ и Сы́ну и Свято́му Ду́ху.
_Троичен Просла́вим Тро́ицу Неразде́льную,/ воспои́м Еди́но Божество́/ со Отце́м Сло́во и Ду́ха Всесвята́го.
И ны́не и при́сно и во ве́ки веко́в. Ами́нь.
_Богородичен Моли́, Его́же родила́ еси́, Го́спода,/ я́ко благоутро́бна естество́м су́ща, Богороди́тельнице,/ спаси́ ду́ши воспева́ющих Тя.
Песнь 8
Ирмос Его́же ужаса́ются А́нгели и вся во́инства,/ я́ко Творца́ и Го́спода,/ по́йте, свяще́нницы, просла́вите, о́троцы,/ благослови́те, лю́дие,/ и превозноси́те во вся ве́ки.
Припев Пресвята́я Богоро́дице, спаси́ на́с.
Весели́тся днесь све́тло Иоаки́м,/ и А́нна непоро́чная Го́споду Бо́гу прино́сит же́ртву,/ да́нную ей от обеща́ния Святу́ю Дщерь.
Припев Пресвята́я Богоро́дице, спаси́ на́с.
Хва́лятся святи́и Дави́д и Иессе́й,/ и Иу́да чти́тся,/ из ко́рене бо их израсте́ плод – Де́ва Чи́стая,/ из Нея́же роди́ся Бог Преве́чный.
Припев Пресвята́я Богоро́дице, спаси́ на́с.
Мари́я Пречи́стая и одушевле́нная ски́ния/ приво́дится днесь в дом Бо́жий,/ и прие́млет Сию́ Заха́рия рука́ми,/ я́ко освяще́нное сокро́вище Госпо́дне.
Припев Пресвята́я Богоро́дице, спаси́ на́с.
Я́ко дверь спаси́тельную и го́ру мы́сленную,/ я́ко ле́ствицу одушевле́нную, почти́м, ве́рнии, вои́стинну Де́ву и Ма́терь Бо́жию,/ благослове́нную рука́ми иере́ев.
Припев Пресвята́я Богоро́дице, спаси́ на́с.
Проро́цы, апо́столи и му́ченицы Христо́вы,/ А́нгелов чи́ни и вси земноро́днии, почти́м пе́сньми Де́ву Чи́стую,/ я́ко благослове́нную Ма́терь Высоча́йшаго.
Припев Пресвята́я Богоро́дице, спаси́ на́с.
В храм Тя принесо́ша, Всенепоро́чная Чи́стая,/ Боже́ственне ро́ждшии Тя, я́ко же́ртву чи́сту,/ и стра́нно водворя́ешися в неходи́мых Бо́гу/ предугото́ватися в жили́ще Сло́ву.
Сла́ва Отцу́ и Сы́ну и Свято́му Ду́ху.
_Троичен Да пое́тся Трисвяты́й Оте́ц, и Сын, и Дух Святы́й,/ Неразде́льная Еди́ница, Еди́но Божество́,/ держа́щее дла́нию всю тварь во вся ве́ки.
И ны́не и при́сно и во ве́ки веко́в. Ами́нь.
_Богородичен Безнача́льное начина́ется Сло́во пло́тию,/ роди́вся, я́ко благоволи́,/ Бог же и Челове́к из Отрокови́цы Де́вы,/ возсозида́я ны, пре́жде па́дшия,/ ра́ди кра́йняго благоутро́бия.
Песнь 9
Ирмос Светоно́сный о́блак, в о́ньже всех Влады́ка,/ я́ко дождь с небесе́ на руно́, сни́де/ и воплоти́ся нас ра́ди,/ быв Челове́к, Безнача́льный./ Велича́ем вси я́ко Ма́терь Бо́га на́шего Чи́стую.
Припев Пресвята́я Богоро́дице, спаси́ на́с.
Из пра́ведных произы́де Иоаки́ма и А́нны/ обеща́ния плод – Богоотрокови́ца Мари́я/ и, я́ко кади́ло прия́тно, пло́тию младе́нствующи,/ приво́дится во святи́лище свято́е/ я́ко Свята́я во святы́х обита́ти.
Припев Пресвята́я Богоро́дице, спаси́ на́с.
Младе́нствующую естество́м и па́че естества́ я́вльшуюся Ма́терь Бо́жию восхва́лим пе́сньми:/ в храм бо зако́нный Го́споду днесь приво́дится в воню́ благово́ния,/ пра́ведных я́ко плод духо́вный.
Припев Пресвята́я Богоро́дице, спаси́ на́с.
Со А́нгелом, е́же ра́дуйся, Богоро́дице прили́чне возопии́м, ве́рнии:/ ра́дуйся, вседо́брая Неве́сто;/ ра́дуйся, о́блаче светлый, из него́же нам возсия́ Госпо́дь, во тьме неве́дения седя́щим;/ ра́дуйся, всех Наде́ждо.
Припев Пресвята́я Богоро́дице, спаси́ на́с.
Святы́х свята́я и Богома́ти Мари́е,/ моли́твами Твои́ми, Чи́стая, свободи́ ны от се́тей вра́жиих/ и вся́кия е́реси и ско́рби,/ ве́рно покланя́ющияся о́бразу свята́го Твоего́ зра́ка.
Припев Пресвята́я Богоро́дице, спаси́ на́с.
Песнь досто́йную Богоро́дице вся тварь со А́нгелом Гаврии́лом взыва́ет, вопию́ще:/ ра́дуйся, Ма́ти Бо́жия Всенепоро́чная,/ Е́юже изба́вихомся пе́рвыя кля́твы,/ бы́вше нетле́ния о́бщницы.
Припев Пресвята́я Богоро́дице, спаси́ на́с.
_Троичен Триипоста́сное естество́, и Неразде́льную сла́ву,/ и в Божестве́ Еди́ном пое́мую непреста́нно на Небеси́ и на земли́/ Тро́ицу Неразлу́чную просла́вим,/ с Сы́ном Отцу́ и Ду́ху покланя́ющеся благоче́стно.
Припев Пресвята́я Богоро́дице, спаси́ на́с.
_Богородичен Под Твое́ благоутро́бие прибега́ющия ве́рно/ и покланя́ющияся благоче́стно Сы́ну Твоему́, Де́во Богороди́тельнице,/ я́ко Бо́гу и Го́споду ми́ра,/ моли́ся от тли и бед изба́вити и вся́ческих искуше́ний.
Светилен
Ю́же дре́вле предвозвести́ проро́ческое сосло́вие,/ ста́мну, и жезл, и скрижа́ль, и несеко́мую го́ру,/ Мари́ю Богоотрокови́цу ве́рно да восхва́лим:/ днесь бо вво́дится во свята́я святы́х воспита́тися Го́споду.
Другой канон праздника
Минея, 24 Ноября, Кано́н пра́здника пе́рвый
Глас 4
Песнь 1
Ирмос Отве́рзу уста́ моя,/ и напо́лнятся Ду́ха,/ и сло́во отры́гну Цари́це Ма́тери,/ и явлю́ся, све́тло торжеству́я,/ и воспою́, ра́дуяся, Тоя́ вхожде́ние.
Припев Пресвята́я Богоро́дице, спаси́ на́с.
Прему́дрости, Пречи́стая, Тя сокро́вище ве́мы и благода́ти,/ точа́щую исто́чник приснотеку́щий ра́зума,/ про́сим: Твоя́ ка́пли одожди́, Влады́чице, е́же воспева́ти Тя при́сно.
Припев Пресвята́я Богоро́дице, спаси́ на́с.
Превы́шши, Пречи́стая, Небе́с бы́вши, храм и пала́та,/ в храм Бо́жий возложи́лася еси́/ Тому́ угото́ватися в Боже́ственное жили́ще прише́ствия Его́.
Сла́ва Отцу́ и Сы́ну и Свято́му Ду́ху.
Свет возсия́вши Богоро́дица благода́ти,/ вся просвети́ и совокупи́ пресве́тлое Ея́ украси́ти торжество́ пе́сньми:/ прииди́те, к Ней стеце́мся.
И ны́не и при́сно и во ве́ки веко́в. Ами́нь.
Дверь сла́вная, по́мыслы непроходи́мая,/ две́ри отве́рзши хра́ма Бо́жия,/ ны́не повелева́ет нам, совше́дшим,/ Боже́ственных Ея́ чуде́с наслади́тися.
Песнь 3
Ирмос Твоя́ песносло́вцы, Богоро́дице,/ живы́й и незави́стный исто́чниче,/ лик себе́ совоку́пльшия, духо́вно утверди́,/ в честне́м вхожде́нии Твое́м/ венце́в сла́вы сподо́би.
Припев Пресвята́я Богоро́дице, спаси́ на́с.
Невестокраси́тель днесь яви́ся кра́сный Де́вы храм и черто́г,/ прие́м одушевле́нный черто́г Бо́жий,/ Чи́стую, и Непоро́чную, и Светле́йшую всея́ тва́ри.
Припев Пресвята́я Богоро́дице, спаси́ на́с.
Дави́д, предначина́я ликова́ние, игра́ет, и ликовству́ет с на́ми,/ и Цари́цу зове́т Тя укра́шену, Пречи́стая,/ предстоя́щу, Всечи́стая, в хра́ме Царю́ и Бо́гу.
Сла́ва Отцу́ и Сы́ну и Свято́му Ду́ху.
Из нея́же преступле́ние произы́де дре́вле ро́ду челове́ческому,/ из Тоя́ исправле́ние и нетле́ние процвете́:/ Богоро́дица днесь приводи́ма в дом Бо́жий.
И ны́не и при́сно и во ве́ки веко́в. Ами́нь.
Игра́ют А́нгельская во́инства и всех челове́к мно́жество,/ и пред лице́м, Пречи́стая, предтеку́т Твои́м днесь свещено́сицы,/ зову́ще вели́чествия Твоя́ в дому́ Бо́жии.
Седален, глас 4
Дави́де, предъиди́ в храм Бо́жий/ и, ра́дуяся, приими́ Цари́цу на́шу, и Той возопи́й:/ вни́ди, Госпоже́, в храм Царе́в, вни́ди!/ Ея́же сла́ва покрове́нно разуме́ется,/ из Нея́же хо́щет источи́тися нам всем Свет – Христо́с.
Песнь 4
Ирмос Неизсле́дный Бо́жий Сове́т/ е́же от Де́вы воплоще́ния/ Тебе́, Вы́шняго, проро́к Авваку́м, усмотря́я, зовя́ше:/ сла́ва си́ле Твое́й, Го́споди.
Припев Пресвята́я Богоро́дице, спаси́ на́с.
Дверь непрохо́дную Бо́жий дом прие́мля днесь,/ преста́ти сотвори́ вся́кой слу́жбе зако́нной,/ я́ко и́стинно яви́ся, зовы́й,/ су́щим на земли́ И́стина.
Припев Пресвята́я Богоро́дице, спаси́ на́с.
Гора́ присе́нная, ю́же прови́де дре́вле Авваку́м,/ предпропове́да внутрь вмести́вшуюся в нехо́дных хра́ма,/ доброде́тели процве́тши, и покрыва́ет концы́.
Сла́ва Отцу́ и Сы́ну и Свято́му Ду́ху.
Ви́девши пресла́вная вся земли́ стра́нныя же и ди́вныя ве́щи,/ ка́ко Де́ва, от А́нгела пи́щу прие́млющи,/ о́бразы строе́ния но́сит.
И ны́не и при́сно и во ве́ки веко́в. Ами́нь.
Храм, и пала́та, и Не́бо одушевле́нное я́вльшися, Богоневе́сто Царе́ва,/ во храм зако́нный приводи́ма днесь,/ Тому́ соблюда́ема, Пречи́стая.
Песнь 5
Ирмос Ужасо́шася вся́ческая/ в честне́м вхожде́нии Твое́м:/ Ты бо, Неискусобра́чная Де́во,/ внутрь вошла́ еси́ в храм Бо́жий,/ я́коже чисте́йший храм,/ всем воспева́ющим Тя/ мир подава́ющая.
Припев Пресвята́я Богоро́дице, спаси́ на́с.
Свяще́ние сла́вное и свяще́нное возложе́ние,/ днесь Пречи́стая Де́ва, возложи́вшися в храм Бо́жий,/ Всецарю́ на́шему Бо́гу Еди́ному в жили́ще соблюда́ется,/ я́ко весть Сам.
Припев Пресвята́я Богоро́дице, спаси́ на́с.
Добро́ту, Пречи́стая, души́ Твоея́ зря не́когда,/ ве́рою Заха́рия возопи́:/ Ты еси́ избавле́ние, Ты еси́ всех ра́дость,/ Ты еси́ воззва́ние на́ше,/ Е́юже Невме́стный вмеще́н мне яви́тся.
Сла́ва Отцу́ и Сы́ну и Свято́му Ду́ху.
О, па́че ума́ чуде́с Твои́х, Всечи́стая!/ Стра́нное Твое́ рождество́ есть,/ стра́нен о́браз возраще́ния Твоего́,/ стра́нна и пресла́вна Твоя́, Богоневе́сто, вся/ и челове́ки несказа́нна.
И ны́не и при́сно и во ве́ки веко́в. Ами́нь.
Све́щник многосве́тлый су́щи, Богоневе́сто,/ днесь возсия́ла еси́ в дому́ Госпо́дни/ и озаря́еши ны честны́ми дарова́нии, Чи́стая,/ чуде́с Твои́х, Богоро́дице всепе́тая.
Песнь 6
Ирмос Боже́ственное сие́ и всечестно́е/ соверша́юще пра́зднество,/ Богому́дрии, Богома́тере,/ прииди́те, рука́ми воспле́щим,/ о́т Нея ро́ждшагося Бо́га сла́вим.
Припев Пресвята́я Богоро́дице, спаси́ на́с.
Вся́ческая Нося́й глаго́лом,/ моли́тву пра́ведных услы́ша./ Те́мже непло́дныя разреши́л еси́ неду́г, я́ко Благоутро́бен,/ ра́дости Вино́вную сим дарова́.
Припев Пресвята́я Богоро́дице, спаси́ на́с.
Сказа́ти хотя́ Господь язы́ком Свое́ спасе́ние,/ Неискусобра́чную ны́не от челове́к прия́т,/ примире́ния зна́мение и обновле́ния.
Сла́ва Отцу́ и Сы́ну и Свято́му Ду́ху.
Я́ко дом су́щи благода́ти,/ в не́мже сокро́вища лежа́т неизрече́ннаго Бо́жия строе́ния, Всечи́стая,/ в хра́ме причасти́лася еси́ нетле́нныя сла́дости.
И ны́не и при́сно и во ве́ки веко́в. Ами́нь.
Диади́му Тя ца́рскую прие́м,/ храм, Богоневе́сто, просвеща́шеся/ и подступа́ше лу́чшим,/ предрече́нных зря на Тебе́ сбытие́.
Кондак, глас 4
Пречи́стый храм Спа́сов,/ многоце́нный черто́г и Де́ва,/ свяще́нное сокро́вище Сла́вы Бо́жия/ днесь вво́дится в дом Госпо́день,/ благода́ть совводя́щи,/ я́же в Ду́се Боже́ственном,/ Ю́же воспева́ют А́нгели Бо́жии:/ Сия́ есть селе́ние Небе́сное.
Икос
Неизрече́нных Бо́жиих и Боже́ственных та́ин зря,/ в Де́ве благода́ть явля́емую и исполня́ему я́вственно,/ ра́дуюся, и о́браз разуме́ти недоуме́юся, стра́нный и неизрече́нный,/ ка́ко избра́нная Чи́стая еди́на/ яви́ся па́че все́я тва́ри ви́димыя и разумева́емыя?/ Те́мже, восхвали́ти хотя́ Сию́,/ ужаса́юся зело́ умо́м же и сло́вом,/ оба́че дерза́я, пропове́даю и велича́ю:/ Сия́ есть селе́ние Небе́сное.
Песнь 7
Ирмос Не послужи́ша тва́ри Богому́дрии/ па́че Созда́вшаго,/ но, о́гненное преще́ние му́жески попра́вше,/ ра́довахуся, пою́ще:/ препе́тый отце́в Госпо́дь и Бог благослове́н еси́.
Припев Пресвята́я Богоро́дице, спаси́ на́с.
Се днесь возсия́ конце́м весна́ ра́достная,/ просвеща́ющи на́шу ду́шу, и помышле́ние, и ум благода́тию,/ торжество́м Богоро́дицы днесь та́инственно да учреди́мся.
Припев Пресвята́я Богоро́дице, спаси́ на́с.
Да дароно́сят днесь вся́ческая Цари́це, Ма́тери Бо́жии/ Не́бо и земля́, и А́нгелов чи́ни, и челове́ков мно́жество/ и да вопию́т:/ во храм вво́дится Ра́дость и Избавле́ние.
Сла́ва Отцу́ и Сы́ну и Свято́му Ду́ху.
Писа́ние мимотече́ и оскуде́ зако́н, я́коже сень,/ и благода́ти лучи́ возсия́ша в храм Бо́жий вше́дшей Тебе́, Де́во Ма́ти Чи́стая,/ в нем благослове́нная.
И ны́не и при́сно и во ве́ки веко́в. Ами́нь.
Повину́ся Рождеству́ Твоему́, Всечи́стая,/ я́ко Творцу́ и Бо́гу Не́бо, и земля́, и преиспо́дняя,/ и всяк язы́к земны́х испове́дает,/ я́ко Госпо́дь яви́ся, Спас душ на́ших.
Песнь 8
Ирмос Слы́ши, Отрокови́це, Де́во Чи́стая,/ да рече́т у́бо Гаврии́л/ Сове́т Вы́шняго, дре́вний, и́стинный:/ бу́ди к прия́тию гото́ва Бо́жию,/ Тобо́ю бо Невмести́мый с челове́ки поживе́./ Тем и ра́дуяся, вопию́:/ благослови́те, вся дела́ Госпо́дня, Го́спода.
Припев Пресвята́я Богоро́дице, спаси́ на́с.
Пречи́стый храм в дом Бо́жий приводя́щи А́нна иногда́,/ вопию́щи, с ве́рою рече́ свяще́ннику:/ ча́до, от Бо́га да́нное мне, прии́м ны́не,/ введи́ во храм Зижди́теля твоего́/ и, ра́дуяся, пой Ему́:/ благослови́те, вся дела́ Госпо́дня, Го́спода.
Припев Пресвята́я Богоро́дице, спаси́ на́с.
Рече́, ви́дев, А́нне иногда́ Ду́хом Заха́рия:/ Жи́зни Ма́терь вво́диши и́стинную,/ Ю́же све́тло проро́цы Бо́жии Богоро́дицу пропове́даша,/ и ка́ко храм вмести́т Ю?/ Тем чудя́ся, вопию́:/ благослови́те, вся дела́ Госпо́дня, Го́спода.
Припев Пресвята́я Богоро́дице, спаси́ на́с.
Раба́ Бо́жия бых аз,– отвеща́ А́нна ему́,–/ призыва́ющи Сего́ ве́рою и моли́твою, прия́ти моея́ боле́зни плод,/ по прия́тии же рожде́нную привести́ Да́вшему Ю./ Тем, зовя́, вопию́:/ благослови́те, вся дела́ Госпо́дня, Го́спода.
Припев Пресвята́я Богоро́дице, спаси́ на́с.
Зако́нное вои́стинну де́ло есть,– свяще́нник рече́ ей,–/ стра́нну же весьма́ вещь поразумева́ю,/ зря Приводи́мую в дом Бо́жий,/ пресла́вно превосходя́щую свята́я благода́тию./ Тем и ра́дуяся, вопию́:/ благослови́те, вся дела́ Го́спо́дня, Го́спода.
Сла́ва Отцу́ и Сы́ну и Свято́му Ду́ху.
Возмога́ю,– рече́ А́нна ему́,– зна́ющи, я́же глаго́леши,/ разуме́еши бо сия́ Ду́хом Бо́жиим,/ я́сно я́же Де́вы пропове́дал еси́;/ приими́ у́бо Пречи́стую в храм Созда́теля твоего́/ и, ра́дуяся, пой Ему́:/ благослови́те, вся дела́ Госпо́дня, Го́спода.
И ны́не и при́сно и во ве́ки веко́в. Ами́нь.
Светоно́сна нам возжже́ся свеща́,– возопи́ свяще́нник,–/ ра́дость велича́йшую светя́щи в хра́ме;/ ду́ши проро́ческия да сра́дуются мне,/ я́ко пресла́вная зря́ще, соверша́емая в дому́ Бо́жии,/ и да вопию́т при́сно:/ благослови́те, вся дела́ Госпо́дня, Го́спода.
Песнь 9
Ирмос Я́ко одушевле́нному Бо́жию киво́ту/ да ника́коже ко́снется рука́ скве́рных,/ устне́ же ве́рных Богоро́дице немо́лчно,/ глас А́нгела воспева́юще, с ра́достию да вопию́т:/ и́стинно вы́шши всех еси́, Де́во Чи́стая.
Припев Пресвята́я Богоро́дице, спаси́ на́с.
Я́ко пресве́тлую, Богоро́дице Чи́стая, душе́вныя чистоты́ иму́щи добро́ту,/ благода́тию же Бо́жиею исполня́ема с Небесе́,/ Све́том Присносу́щным просвеща́еши всегда́ с весе́лием вопию́щия:/ и́стинно вы́шши всех еси́, Де́во Чи́стая.
Припев Пресвята́я Богоро́дице, спаси́ на́с.
Прелета́ет, Богоро́дице, Чи́стая, чу́до Твое́ си́лу слове́с:/ те́ло бо в Тебе́ поразумева́ю па́че сло́ва,/ тече́ния грехо́внаго неприя́тно./ Те́мже благода́рственно вопию́ Ти:/ и́стинно вы́шши всех еси́, Де́во Чи́стая.
Припев Пресвята́я Богоро́дице, спаси́ на́с.
Пресла́вно прообразова́ше, Чи́стая, зако́н Тя ски́нию и Боже́ственную ста́мну,/ стра́нен киво́т, и катапета́сму, и жезл,/ храм неразруши́мый и дверь Бо́жию./ Те́мже науча́ют Тебе́ зва́ти:/ и́стинно вы́шши всех еси́, Де́во Чи́стая.
Припев Пресвята́я Богоро́дице, спаси́ на́с.
Песнопоя́ Тебе́,/ провозглаша́ше Дави́д, глаго́ля Тя Дщерь Царе́ву,/ красото́ю доброде́телей, одесну́ю предстоя́щую Бо́га, ви́дев Тя упещре́ну./ Те́мже, проро́чествуя, вопия́ше:/ и́стинно вы́шши всех еси́, Де́во Чи́стая.
Припев Пресвята́я Богоро́дице, спаси́ на́с.
Богоприя́тну предзря́, Соломо́н пропове́да Тя одр Царе́в,/ живы́й исто́чник запеча́тствован,/ из него́же нему́тная нам произы́де вода́, ве́рою вопию́щим:/ и́стинно вы́шши всех еси́, Де́во Чи́стая.
Припев Пресвята́я Богоро́дице, спаси́ на́с.
Подае́ши дарова́ний Твою́ тишину́, Богоро́дице, души́ мое́й,/ точа́щи жизнь Тебе́ чту́щим по до́лгу,/ Сама́ защища́ющи, и покрыва́ющи, и соблюда́ющи вопи́ти Тебе́:/ и́стинно вы́шши всех еси́, Де́во Чи́стая.
Светилен
А́нгельстии чи́ни и му́ченический лик пра́зднует днесь с на́ми/ в Боже́ственнем введе́нии Богоотрокови́цы и Ма́тере Госпо́дни/ от Иоаки́ма же и А́нны,/ вку́пе тве́рдаго Мерку́рия и пресла́вныя Екатери́ны./ И́хже моли́твами обрести́ нам оставле́ние мно́гих согреше́ний, мо́лимся.